吳地方言版
()周處除三害（轉載的）
古辰光宜興叫荊溪。周處是荊溪縣西步村人，後來才搬到縣城東門外頭住。他個老子叫周魴，做過太守，周處小辰光頑皮到勿得了，歡喜弄槍弄棒，力氣又大，看到哪家勿順眼，拔出拳頭就打，勿曉則有多少人吃過佗個虧，嘸不一個勿恨佗，拿佗又嘸辦法。
搿一天，佗走過東門菜花橋一爿酒坊，一隻狗從酒坊里一竄出來，朝佗他汪幾聲。周處又發火咧：「你搿只鬃牲，來咬我周處嗒？」擒起腳就踢，狗被佗踢到汪汪直叫，滿處亂跑。
酒坊老闆看到是周處，要緊嗑頭作揖，向周處賠罪，請周處饒啦搿只看家狗。周處惡聲惡氣氣講：「狗勿打殺，酒缸打翻！」老闆嘸辦法想，眼睜睜看佗拿狗打殺啦。
周處打殺酒坊看家狗搿事體一息息就傳遍全城。城裏人都講：本來荊溪有兩害，現在變成則三害咧。一個老佬叫士吉，佗講：「我來教訓教訓佗。」有人講：「覅去送命吧」。士吉老漢講：「我自有辦法。」
士吉就登勒城門口候好則，一直候到吃過飯，周處搖啊搖，過來則咧。
士吉等周處走到面前，就自言自語講：「周處搿只細鬃牲，要麼我看勿見佗，看見佗要教訓教訓佗。」
周處聽到有人講要教訓佗，就大喝一聲：「呔！你講底個！」
「我講，念周處個父親搭我是結拜弟兄，勿然要同佗拚命。」
周處本來要伸拳頭，聽到佗是父親個結拜兄弟，就朆捋拳頭。佗問士吉：「伲為底要同周處拚命？」
「近年來南山出則一隻吊睛白額老虎，白rì里都出來傷人；長橋底下一隻蛟龍，年年要供祭它一個童男，否則興風作浪，勿曉則傷則多少人命咧。如今又出則一個周處，橫行鄉里，為非作歹。連同南山白額虎，長橋水中蛟，已成荊溪三害，老百姓還有rì腳過勿啊？拼也是死，勿拼也是死！」
「周處本事大，是少年英雄，哪會是荊溪一害？」
「哈哈哈！講底個少年英雄，佗會斬蛟shè虎，為民除害勿啊？」
「蛟龍老虎算底個，還會吃則住我個刀槍弓箭嗒？」講完，周處轉身就走。
周處跑到家，帶上寶劍，背起弓箭，直奔南山。滿山跑下來，尋勿到老虎。天晏下來則后，佗就蹲勒柴窠裏頭。勿一息，一陣風，呼——！一聞，風裏有腥氣，曉則是老虎，天晏，又看勿見老虎。
老虎蹲勒山頭頂，尾巴甩呀甩，覺著越甩越重，還有點痛兮兮——原來一隻夾蛇烏龜，齊頭夾勒老虎尾巴上，尾巴越甩，夾得越緊。
搿辰光，一陣缸片雲推過去，露出麻花亮月。几几乎是同一辰光，周處看見則老虎，老虎也看見則周處。
等周處挽弓搭箭，老虎四腳一蹬，直朝周處撲來。周處要發箭已經來勿及，料定必死無疑。哪垯曉則老虎個尾巴上夾着一隻大烏龜，離開周處還有一線線，就從空中跌則下來。周處要緊弓拉滿月，對準老虎頭「嗒」一箭，shè中老虎左眼。老虎痛到要死，縱身一跳，箭尾正好碰勒樹丫枝上，箭頭穿透後腦。周處見老虎跌勒地上，跑上去一看，箭勒老虎頭上一個對穿過。他怕老虎勿死，又對準老虎右眼一腳，連眼烏珠都踢則出來咧。
周處拿老虎掮到家，拿老虎皮剝剝，虎骨熬熬，又燒一大鍋老虎肉，請街坊鄰居都來吃老虎肉。周處打死南山白額虎個事體一間間就傳遍則荊溪城。大家都講周處除啦一害，做則好事咧。
周處shè死老虎，又去斬水中蛟。
搿辰光是十月天氣，霧多，蛟龍身上癢，勒水裏頭蹲勿住，就要浮出水面。搿天大霧，周處身背寶劍，一個老早就來到長橋上。一息息，長橋底下水浪翻滾，水花飛濺。周處曉則蛟龍要出水咧，眼睛睜到蠻大，眨勿眨看好則水面。突然，一個浪頭衝天而起，蛟龍半條身子露出水面。說時遲，那時快，周處手持寶劍，縱身一躍，正好騎勒蛟龍頸根頭。周處左手緊緊握住蛟龍獨角，右手拿寶劍對準蛟龍頸根刺下去，拼儘力道硬是刺勿下——龍鱗又厚又硬，堅硬如鐵。
蛟龍覺著有人騎勒它頸根上，就拿尾巴用力一甩。周處聽到背後陣風聲，隨首一低頭，緊緊貼伏勒搿蛟龍身上。蛟龍個尾巴朆甩到周處，反而重重一記，甩勒自家頭上，痛到直抖，朆想到它一陣抖，拿周處抖勒水勒咧。
搿辰光，蛟龍已經逃進太湖，周處勒水裏頭奮力追趕。眼看蛟龍越逃越遠，周處見湖邊有座山，就高聲喊道：「山哥哥！山哥哥！快點幫我攔住它！」說也奇怪，周處話音剛落，搿座山真咾長一個山嘴，拿蛟龍攔住。蛟龍只好回頭逃，齊頭碰到后底追趕來個周處。周處一把抓住龍角，一個翻身又爬上龍背。
周處緊握劍柄，對準龍頸根死命刺，死命戮，還是戮勿進。佗就拿寶劍順着龍頸根往下移，齊頭戮勒命門裏，一股腥血直冒出來。緋紅個血一直淌到太湖邊頭一條港勒——蛟龍終於被周處刺死啦。周處拿蛟龍拖上岸，把龍角斬下來，又拿龍皮剝下來，挑着龍皮、龍角往城裏去。
周處從東門進城，走經菜花橋酒坊，酒坊老闆捧出一大壇酒，慶賀周處斬蛟shè虎、為民除害。滿城百姓也湧來看龍皮龍角，看斬蛟shè虎個英雄。
周處悔過自新除三害，後來又聽則士吉老佬的話，拜陸機陸云為師，終於成為一代名將。
后涉來，人們把周處開頭用劍刺蛟龍個地方叫做「上移皮」，第二劍刺中蛟龍命門個地方叫「下移皮」，攔住蛟龍個山咀叫「攔山咀」，被龍血染紅的港叫「紅港」。因為蛟龍死啦咧，輪到供祭男童個村莊總算保住則男童，搿個村就開始叫「男留村」——搿些地名到今朝還一直存在。長橋也被改成蛟橋，連蘇東坡還洗石題詞：「晉平西將軍周處斬蛟之橋。」